Descripción

Josep Carles Laínez (Zidá de Balenzia, 1970) ye o escritor más meridional de a nuesa literatura contemporania. Miembro de pleno dreito de o Consello d’a Fabla Aragonesa y miembro fundador de a Colla de Fablans d’o Sur d’Aragón y de a rebista Ruixada, ye o autor de os poemarios En o gudrón espígol xuto (Teruel, 1991), Peruigilium Veneris (Uesca, 1992), Bel diya (Uesca, 1998), y de a nobela curta A besita de l’ánchel (Uesca, 1995). En as zagueras añadas ha escrito también en balenziano-aragonés u castellano-aragonés, fruito de o cualo son bellos poemas amanexitos en MicRomania.

Deseyos bataleros ufre una muestra de o quefer articulista de Josep Carles Laínez. Se bi replegan as suyas colaborazions en o semanario Siete de Aragón, totas eras chupitas de cosmopolitanismo, de zierto luxo y de a perén rebesada de o imposible.